濕地保育公園系統落成遙遙無期？三寶樹濕地公園要等到2039年先落成！
上星期政府公佈咗《建立濕地保育公園系統策略之可行性研究》，綠色和平當然樂見濕地公園終於有進展，不過唔單止份研究遲咗9個月先出台，預期興建時間仲至少數以十年計。雖然當中嘅三寶樹作為補償新田科技城填塘破壞嘅措施，不過科技城已經申請緊撥款，出年就開始動工，保育會唔會跟唔上發展破壞嘅步伐？
要起過半世紀嘅公園？
三寶樹濕地保育公園預計等到2039年先落成，研究指出，其他3個濕地公園未有具體時間表，只係話要根據三寶樹嘅經驗，依次展開進一步研究。起一個都至少15年，如果真係逐個落成完先再研究，會唔會等多60年，即係歷經12屆政府先落實到成個濕地保育公園系統？
唔知到時會係今年出世嘅小朋友，可以拎到2蚊搭車優惠先，定成個濕地保育公園系統落成先呢？
說好的改善「生境連繫」呢？
濕地完整同相連程度，對生態價值非常重要。而新田魚塘連同毗鄰濕地，正正構成大灣區僅存最完整嘅沿海濕地系統。呢個計劃公佈之初，其中一個目標就係要保障濕地系統完整，不過依家研究就估計公園唔能夠改善生境連繫，只能維持。雖然冇說明原因，不過新田科技城將濕地一分為二，唔知關唔關事呢？
濕地保育系統向前行半步係好事，不過都遠遠未夠🏃🏿♀️綠色和平促請政府加快三寶樹濕地保育公園落成時間，趕上新田科技城入伙，避免破壞濕地行為擴散，並盡快定立其餘濕地保育公園嘅時間表同保育細節！
邀請你嘅朋友一齊Follow @greenpeace_hk，了解世界各地嘅環境議題，令地球更好，一齊踏出一小步💪🏼💪🏼
